Krummi fæðist á teikniborðinu

Já, krumminn minn var lengi á teikniborðinu. Ekki bara vegna útlínanna, heldur líka vegna karaktereinkennanna sem þessi fugl hefur svo sannarlega. Ég er til dæmis löngu fallin frá því sem ég ætlaði að skrifa fyrst, sem lá meira í þjóðarsálinni en minni eigin (þ.e. þessi neikvæðni gagnvart krumma, sem NB ekki er auðvelt að finna upphafið af). Ég varð hins vegar "ástfangin" af krumma, ef svo mætti segja. Ég hét því eins og sjá má í upphafi þessarrar bloggsíðu, að koma krumma til vegs og virðingar.

Það er ekki nokkur leið að sjá teikningarnar af krumma á þessari mynd, en það verður bara að hafa það, ég á enga betri.

Sjaldséðir hvítir hrafnar?

 

Af hverju talar fólk um sjaldséða hvíta hrafna í daglegu tali? Ætli það sé ekki vegna þess að þeir sjást sjaldnast eða alls ekki. Hér er orðaleikur í gangi í íslenskri tungu og allt gott og blessað með það nema kannski fyrir útlendinga sem þekkja ekki menningararfinn í tungumálinu (og ekki við sjálf ef nánar er út í það er farið).

En um sjaldséða hvíta hrafna. Eins og áður leitaði ég á netinu, en fékk engar upplýsingar þar. Hins vegar varð á vegi mínum fullorðin og þroskuð kona sem sagðist hafa komið að hrafnshreiðri í æsku þar sem voru fjórir ungar og þar af einn skjannahvítur. Krakkagengið í hennar sveit var ekkert að láta fullorðna fólkið vita um þennan fund, heldur kaus að eigna sér vitneskjuna  sem eins konar leynifundar-félag. (Könnumst ábyggilega mörg við svoleiðis -félög frá yngri árum.) Alla vega þá varð leynifundarhópurinn fyrir miklum vonbrigðum næst þegar þau komu að hreyðrinu, því hvíti unginn var horfinn.
Það eru til margar skýringar á því hvers vegna hvítir hrafnar eru svona sjaldséðir. Ein algengasta skýringin (google) er sú að (hrafns) foreldrarnir sjái veikleikana/gallana (ekki eins og fólk er flest) í þeim unga sem er öðruvísi. Það skynja svo hinir ungarnir (í sama hreiðrinu) sem berjast um fæðuna sem fugl/mamma kemur með  handa þeim í gogginn. Þar með eru endalokin augljós og þess vegna gætu hvítir hrafnar verið sjaldséðir.

Nátthrafn

 

Höfum við einhvern tímann velt fyrir okkur hvaðan orðið "Nátthrafn" kemur? Ég leitaði t.d. á google og fékk eintóma nátthrafna í þeirri merkingu að þeir/þau hefðu vakað alla nóttina. En ég var að leita að tengingu við  hrafninn og það var alls ekki auðvelt að finna. Að lokum tókst mér að finna skýringu í þjóðsögum Jóns Árna. sem segir svo:
Í þá daga (þegar fólk bjó í sveitum, ekkert rafmagn osfrv.) ef krunk heyrðist um nótt, var augljóslega draugur á ferð, því hrafnar sofa á nóttunni. Því var sá er gaf frá sér krunkið kallaður "Nátthrafn" - eða næturdraugurinn....

Krummi og umhverfismál

 

Það er farið fram á það hér á bloggsíðunni að maður velji einhvern ákveðinn flokk til að tengja viðfangsefni sitt við s.s. eins og umhverfismál (sjá fyrirsögn). Datt í hug að krumminn minn gæti fallið undir það málefni. Eitt er víst að íslenski hrafninn er á válista, vegna þess að hann er drepinn í þúsundatali skv. fuglatalningasíðunni. Enginn getur hins vegar svarað því, "Hvers vegna". Einhver maður sagði við mig... "Það eru bara sumir sem eru skotglaðir og finnst hrafninn vera réttdræpur, þar sem ekkert er af honum að hafa".

Uppgötvaði krumma í Hveragerði

 

Ekki það að ég hafi ekki verið meðvituð um krumma fram til þessa. Heldur fékk ég alveg nýja sýn á þennan líka frábæra og skemmtilega fugl þegar ég dvaldi í Hveragerði um mánaðarskeið í febrúar 2008.
Það er mikið af hröfnum í Hveragerði og sökum þess hversu víðsýnt er á þessum slóðum, sléttlendi svo langt sem augað eygir og hægt að sjá á heimsenda að manni finnst, þá ber mikið á hrafninum. Þarna voru hrafnar í tugatali og fannst mér óskaplega gaman að fylgjast með hegðun þeirra. Þeir léku sér meira og minna allan daginn, flugu listflug einir eða tveir til þrír saman. Ég varð gjörsamlega heilluð af þessu og fór að fylgjast enn betur með hegðun þeirra frá morgni til kvölds. Ég tók til dæmis eftir því að þeir komu margir upp í loftið af sama staðnum við sólarupprás á morgnana. Tugir hrafna flugu upp frá sama staðnum, sveimuðu í kös um stund, en flugu svo hver í sína áttina, allar áttirnar fjórar. Ég velti fyrir mér hvort þeir væru búnir að skpuleggja daginn, það er hvert hver þeirra ætti að fljúga þann daginn. Svo sá maður þá á sveimi tvo og þrjá saman yfir bænum yfir daginn. Greinilegt að þeir voru að leyta að fæðu og sá maður spenninginn meðal þeirra þegar einn var með eitthvað góðgæti í gogginum og hinir komu og að manni virtist reyndu að hrifsa góðgætið úr goggi þess sem hafði hnossið í sínum goggi. En allt virtist þetta vera í mestu vinsemd og eins og athöfnin væri meira leikur en barátta um bitann.

Krunk

Þetta blogg er tileinkað krumma og mun þegar fram í sækir birta ýmsan fróðleik og sögur af íslenska hrafninum ásamt því að kynna "Hrafninn sem flýgur", verkefni sem er í vinnslu og verður upplýst um síðar.